PIJARY.INFO

25 жніўня ў парафіі Унебаўзяцця Найсвяцейшай Марыі Панны (Ліда – мікрараён Індустрыяльны) адбылася ўрачыстая кансэкрацыя касцёла св. Юзафа Каласанса. Кансэкрацыю святыні здзейсніў кс. біскуп Аляксандр Кашкевіч, ардынарый Гродзенскай дыяцэзіі, пры ўдзеле дапаможнага біскупа Гродзенскай дыяцэзіі Юзафа Станеўскага. Ва ўрачыстасці прынялі ўдзел шматлікія госці: генеральны консул Рэспублікі Польшча ў г. Гродна Яраслаў Ксёнжэк, правінцыял Польскай правінцыі ордэна піяраў а. Юзаф Матрас SP, айцы піяры з-за мяжы, субраты з Беларусі, дыяцэзіяльныя святары, прадстаўнікі мужчынскіх і жаночых манаскіх супольнасцяў.

Падчас казання кс. біскуп Аляксандр Кашкевіч прыгадаў, што кансэкрацыя азначае поўнае ахвяраванне святыні ва ўласнасць Бога, што праз памазанне хрызмам алтар і ўвесь касцёл атрымліваюць місію – весці людзей шляхам збаўлення. Таксама кс. біскуп адзначыў: «Для піярскай супольнасці ў Беларусі 2017 год з’ўляецца годам урачыстасцяў, бо да двух юбілеяў, якія святкуе ўвесь ордэн піяраў, – 400-годдзе існавання ордэна піяраў, 250-годдзе з дня кананізацыі св. Юзафа Каласанса – далучылася ўрачыстасць кансэкрацыі касцёла св. Юзафа Каласанса ў Лідзе».

 Сёлета з 13 па 20 жніўня айцы-піяры з Ліды ( Індустрыяльны, парафія Унебаўзяцця Найсвяцейшай Панны Марыі ) правялі традыцыйныя “Канікулы з Богам”. У адпачынку прыняло ўдзел 300 дзяцей, як з піярскай, так і з іншых парафій ( некаторыя дзеці спецыяльна ў гэты час прыехалі з іншых гарадоў да сваіх бабуль і дзядуль, каб адпачыць у лагеры ) . Маленькія вернікі праводзілі час з песнямі, танцамі, гульнямі і ў той жа момант паглыблялі сваю веру, а дапамагалі ім у гэтым айцец-пробашч парафіі Андрэй Агель, айцец Аляксандр Махнач і 30 апекуноў-важатых!

З 3 па 9 ліпеня моладзь з Ліды і Шчучына разам з а. Вітальдам Пяцельчыцам SP і а. Андрэем Агелем SP прымала ўдзел у Міжнароднай сустрэчы піярскай моладзі (Piarist Youth Meeting 2017) у г. Стражніцы (Чэхія). У сустрэчы ўдзельнічалі каля 180 маладых людзей з пяці краін Еўропы: Беларусі, Венгрыі, Польшчы, Славакіі і Чэхіі.

Дэвізам сустрэчы былі абраны словы «З Каласансам да крыніц», што зусім не выпадкова, бо сёлета ўся піярская сям’я святкуе двайны юбілей: 400-годдзе існавання ордэна піяраў і 250-годдзе з дня кананізацыі св. Юзафа Каласанса. Вельмі сімвалічна, што месцам правядзення Міжнароднай сустрэчы піярскай моладзі падчас Каласансаўскага Юбілейнага Года была абрана Чэхія, таму што менавіта ў чэшскі горад Мікулаў у 1631 г. прыбылі першыя піяры з Італіі, каб распачаць сваю дзейнасць у Цэнтральнай і Усходняй Еўропе.

30 красавіка ў піярскай парафіі Унебаўзяцця НПМ у Лідзе (Індустрыяльны) 37 асобаў прыняло сакрамэнт канфірмацыі з рук дапаможнага біскупа Гродзенскай дыяцэзіі Юзафа Станеўскага. Ва ўрачыстай св. Імшы прыняў удзел кс. канонік Уладзімір Гуляй, пробашч лідскай парафіі Узвышэння Святога Крыжа, і а. Андрэй Агель SP, які рыхтаваў вернікаў да прыняцця сакрамэнту сталасці.

Біскуп Юзаф заклікаў кандыдатаў адкрыцца на Духа Святога і сем Ягоных дароў: мудрасцi, розуму, рады, мужнасцi, умеласцi, пабожнасцi i боязі Божай. Падыходзячы да кожнага, іерарх намашчваў алеем святога хрызма і накіроўваў словы: “Прымі знак Духа Святога”.

У шостую нядзелю Вялікага посту, якая носіць назву Пальмавай нядзелі або Нядзелі Мукі Пана, узгадваецца ўрачысты ўваход Езуса у Ерузалем, калі габрэі радасна віталі Яго пальмавымі галінкамі. У нашай традыцыі ў гэты дзень вернікі прыносяць у касцёл прыгожа аздобленыя галінкі вербаў — сімвал жыцця, якое адраджаецца.

Ужо з самай раніцы вернікі нашай парафіі спяшаліся ў святыню з прыгожымі вербамі, каб разам  перажываць таямніцы пакуты, смерці і змёртвыхпаўстання Хрыста, нашага Збаўцы і Пана. На кожнай св. Імшы было мнагалюдна.