КАНФІРМАЦЫЯ Ў ШЧУЧЫНЕ: “СВЯТЫ ДУХ РАЗАГРАВАЕ НАШЫ СЭРЦЫ”

bezmowanie_szuszin_3

12 мая біскуп Гродзенскі Аляксандр Кашкевіч наведаў парафіяльную супольнасць св. Тэрэзы Авільскай у Шчучыне.

Падчас святой Імшы іерарх удзяліў сакрамэнт канфірмацыі моладзі гэтай парафіі, a таксама моладзі парафіі св. Станіслава, біскупа і мучаніка, у Ляцку.

У гаміліі біскуп казаў пра адкрыццё на дзеянне Духа Святога, бо без Яго, па словах іерарха, “нам было б вельмі цяжка верыць, маліцца, трываць у праўдзе, справядлівасці і любові, пераадольваць цяжкасці, змагацца з уласнымі грахамі, выконваць добрыя ўчынкі, узрастаць у любові да Бога і да бліжняга”.

Пастыр Касцёла на Гродзеншчыне падкрэсліў, што “Святы Дух разагравае нашыя сэрцы, чыніць іх чуйнымі на Божую любоў і здольнымі адорваць цяплом любові ўсіх тых, хто побач з намі”.

Біскуп заклікаў моладзь, якая атрымала ў гэты дзень сем дароў Духа Святога ў сакрамэнце хрысціянскай сталасці, быць для свету жывым Евангеллем і паказваць іншым шлях да Бога сваім прыкладам.

НОВЫЯ МІНІСТРАНТЫ І ЛЕКТАРЫ З’ЯВІЛІСЯ Ў ШЧУЧЫНСКАЙ ПАРАФІІ

25 красавіка, у нядзелю Добрага Пастыра, у парафіі св. Тэрэзы Авільскай у Шчучыне з’явіліся тры новыя міністранты і тры лектары.

Урачыстае прыняцце новых членаў у лік міністрантаў і лектараў здзейсніў пробашч парафіі а. Андрэй Агель SP.

Юнакі з гонарам прынялі прысягу, паабяцаўшы служыць аддана і пабожна, і апранулі белыя комжы. Лектары атрымалі крыжы.

Пасля падрыхтоўкі, якая доўжылася некалькі месяцаў, юныя католікі пачалі служыць пры алтары разам са святарамі. У вачах хлопцаў гарэў яркі агеньчык адданасці і добрасумленнага служэння.

Духоўнае ўзрастанне веруючых пачынаецца ў сям’і, таму вельмі сімвалічнай была супольная сустрэча святароў, міністрантаў і іх бацькоў. Усе прысутныя з задавальненнем размаўлялі, гулялі ў розныя гульні і частаваліся прысмакамі.

У адрас брата Віктара і дыякана Аляксандра гучалі словы падзякі за падрыхтоўку юнакоў да гэтага важнага ў іх жыцці кроку.

DSC 6300

Хочацца пажадаць новым “ахоўнікам алтара” з гонарам несці любоў да Бога, верна служыць Хрысту і быць прыкладам для ўсіх.

КРЭАТЫЎНЫ АДПАЧЫНАК ЗЛАДЗІЛІ ЎДЗЕЛЬНІКІ МОЛАДЗЕВАГА ХОРУ СА ШЧУЧЫНА

szuczyn 7

 

Удзельнікі моладзевага хору “Calasanz” парафіі св. Тэрэзы ад Езуса (Авільскай) у Шчучыне крэатыўна правялі выхадныя.

Яны наведалі Гродна, дзе пабылі на малітве ў катэдральнай базыліцы св. Францішка Ксаверыя. Таксама яны пазнаёміліся з багатай гісторыяй гэтай святыні, якая з’яўляецца маці ўсіх касцёлаў Гродзеншчыны.

Потым у іх быў час на адпачынак і прабыванне разам. Групу суправаджалі пробашч парафіі a. Андрэй Aгель SP i арганістка Людміла Аляксандраўна, па ініцыятыве якіх адбылася паездка.

Усе ўдзельнікі вельмі чакалі гэтага падарожжа, засталіся ім задаволеныя і атрымалі яркiя ўражаннi.

 

 

КРЫЖОВЫ ШЛЯХ, РАЗВАЖАННІ НА ТЭМУ ВЕРЫ, ГРАХУ, ПРАЎДЫ ПРА СЯБЕ ЎКЛЮЧАЛІ РЭКАЛЕКЦЫІ Ў ШЧУЧЫНЕ

rec szuczin 13

З 24 па 26 сакавіка ў парафіі святой Тэрэзы Авільскай у Шчучыне праходзілі велікапосныя рэкалекцыі, якія праводзіў айцец марыянін Павел Федаровіч з Барысава.

На працягу трох дзён святар разважаў падчас навукі пра веру, грэх, праблему звычак чалавека, а таксама дзяліўся асабістым сведчаннем са свайго жыцця.

У межах духоўных практыкаванняў былі і сустрэчы рэкалекцыяніста з моладдзю. У першы дзень айцец Павел разважаў разам з моладдзю на тэму “праўда пра сябе”. Падчас сустрэчы ён асабліва падкрэсліў, як важна ведаць сябе і стаяць перад сабой у праўде, каб будаваць добрыя адносіны з Богам і бліжнім. У другі дзень рэкалекцый усе разам маліліся перад Найсвяцейшым Сакрамэнтам, разважаючы пра безумоўную любоў Бога да сваіх дзяцей.

rec szuczin 8

Апошні дзень рэкалекцый быў асабліва важным. Парафіяне са сваімі святарамі і рэкалекцыяністам прайшлі Крыжовым шляхам па вуліцах горада, разважаючы над падзеямі з жыцця Збаўцы праз прызму Яго Мукі. Падчас набажэнства вялікі крыж неслі па запрашэнні айца Паўла людзі з рознымі сацыяльнымі статусамі. У стацыях Крыжовага шляху вернікі стараліся ўбачыць сябе, падзеі штодзённага жыцця і знайсці дапамогу ў Евангеллі.

Можна спадзявацца, што рэкалекцыі садзейнічалі таму, каб Езус знайшоў шлях да кожнага з іх удзельнікаў.

Айцец Павел пажадаў парафіянам, каб пасля гэтых духоўных практыкаванняў яны адчулі сябе іншымі, перамененымі, напоўненымі любоўю і маглі ўбачыць Збаўцу ў кожным чалавеку, каб калісьці пачуць словы: “Прыйдзіце, благаслаўлёныя Айца Майго, прыміце ў спадчыну Валадарства, падрыхтаванае вам ад стварэння свету” (Мц 25, 34).

Пробашч айцец Андрэй Агель SP ад імя сабратоў і ўсіх парафіянаў падзякаваў айцу Паўлу за прамоўленае Божае слова, навуку і дзяленне асабістым досведам. Словы ўдзячнасці пробашч выказаў таксама святарам Шчучынскага дэканату за ўдзяленне сакрамэнту пакаяння.

БІСКУП СТАНЕЎСКІ ВА ЎРАЧЫСТАСЦЬ АБ’ЯЎЛЕННЯ ПАНА НАВЕДАЎ ЛІДСКУЮ ПАРАФІЮ УНЕБАЎЗЯЦЦЯ НАЙСВЯЦЕЙШАЙ ПАННЫ МАРЫІ

8 Студзень 2021

stanewski piary 26 студзеня, ва ўрачыстасць Аб’яўлення Пана, дапаможны біскуп Гродзенскай дыяцэзіі Юзаф Станеўскі наведаў парафію Унебаўзяцця Найсвяцейшай Панны Марыі ў Лідзе (Індустрыяльны), у якой душпастырскую працу вядуць айцы піяры.

Наведванне біскупам Станеўскім гэтай парафіі ва ўрачыстаcць Эпіфаніі з’яўляецца ўжо шматгадовай традыцыяй.

Іерарх узначаліў святую Імшу ўвечары, на якой сабраліся вернікі, каб сустрэцца з Панам і прывітаць шаноўнага госця.

У гаміліі біскуп засяродзіўся над зместам урачыстасці Трох Каралёў – аб’яўленні таямніцы збаўлення ў Езусе Хрысце. Іерарх заахвоціў вернікаў, каб, вяртаючыся з касцёла, яны ўжо ішлі новым шляхам – шляхам навяртання, сваёй верай распальвалі веру і любоў да Бога ў сэрцах тых, хто ў гэтым мае патрэбу.

Расклад катэхезы на 2020-21г. Шчучын

Расклад катэхезы на 2020-21г. Лiда

Thanx: Goutu