PIJARY.INFO

У Нядзелю радасці (IV нядзеля Вялікага посту) парафія св. Тэрэзы Авільскай у Шчучыне перажывала сваю радасць. Роўна 10 новых міністрантаў першы раз у гэты дзень апранулі белыя комжы.

Да гэтай урачыстасці кандыдаты рыхтаваліся ўжо з верасня мінулага года. Каб праверыць, наколькі яны падрыхтаваны да службы, быў загадзя праведзены тэарэтычны і практычны экзамен.

Таксама ўпершыню ў парафіі ў гэты дзень з’явіліся цырыманіярыі – 4 асобы. Знешнім знакам іх службы пры алтары стала белая лектарская альба.

Фотаздымкі (Людміла К.) можна паглядзець тут.

30 сакавіка ў Шчучыне адбылася малітоўна-фармацыйная сустрэча для бацькоў, дзеці якіх належаць да розных парафіяльных груп. Сустрэча пачалася ў парафіяльнай святыні набажэнствам Крыжовага шляху, у якім прынялі ўдзел таксама і дзеці.

Наступнай часткай праграмы стала фармацыйная сустрэча на тэму “Скарбы св. Імшы”. Падчас яе разважалася аб тым, навошта мы прымаем удзел у святой Імшы, чаму Касцёл заахвочвае да частага прыняцця святой Камуніі, закраналіся іншыя пытанні, звязаныя з сакрамэнтам Эўхарыстыі.

Падсумаваннем сустрэчы стала супольная гульня бацькоў і дзяцей у валейбол і футбол.

Фотаздымкі (Людміла К.) можна паглядзець тут.

Прадстаўнікі літургічнай службы алтара са Шчучына наведалі навіцыят і семінарыю айцоў піяраў у Польшчы, а таксама сталі сведкамі прыняцця вечных манаскіх абяцанняў.

Навіцыят айцоў піяраў, які з’яўляецца прасторай духоўнага, інтэлектуальнага, чалавечага і піярскага развіцця, знаходзіцца ў Жэшуве, а семінарыя – у Кракаве.

Падчас наведвання гэтых месцаў хлопцы са Шчучына мелі магчымасць даведацца пра гісторыю Ордэна Духоўных Рэгулярных Убогіх Маці Божай Пабожных Школаў і бліжэй пазнаёміцца з яго заснавальнікам св. Юзафам Каласансам. Таксама яны маглі зблізку прыгледзецца да манаскага жыцця.

Паводле grodnensis.by

2 сакавіка для дзяцей і моладзі са Шчучына быў арганізаваны сумесны выезд у горад Гродна. Падчас невялікага падарожжа яго ўдзельнікі мелі магчымасць бліжэй пазнаёміцца з с. Ганнай, з кангрэгацыі Сясцёр Найсвяцейшай Сям’і з Назарэта, і даведацца, як выглядае штодзённае жыццё сясцёр з гэтай манаскай супольнасці, а таксама наведаць міждыяцэзіяльную вышэйшую духоўную семінарыю, аб гісторыі якой распавёў хлопцам кл. Павел.

Забаўляльнай часткай дадзенага выезду стала гульня ў лазертаг (для юнакоў) і скачкі на батутах (для дзяўчат).

Фотаздымкі можна паглядзець тут.

23 лютага ў Шчучыне быў арганізаваны спартыўны дзень для Літургічнай Службы Алтара. У праграме былі разнастайныя конкурсы, індывідуальныя і групавыя, такія, як шашкі, настольны футбол, тэніс, марскі бой і г.д.

На заканчэнне адбылася цырымонія ўручэння ўзнагарод і салодкіх падарункаў.

Фотаздымкі можна паглядзець тут.

22 лютага ў мясцовай святыні ў Шчучыне з сольным канцэртам выступіў хрысціянскі гурт «Laudans». Дуэт зайграў песні са свайго новага альбома «Звязаны з часам», а таксама некалькі кампазіцый з мінулых альбомаў.

Фотаздымкі можна паглядзець тут.

22 лютага ўпершыню ў Шчучыне выступіць хрысціянскі гурт Laudans. Канцэрт адбудзецца ў парафіяльнай святыні (св. Тэрэзы Авільскай) у 19:30. Сардэчна запрашаем!

26 студзеня ў Шчучыне пры тутэйшай каталіцкай парафіі, у якой нясуць служэнне айцы Пабожных школаў — піяры, адбылася вечарына музыкі і паэзіі.

Падчас першай часткі сустрэчы моладзь мела магчымасць пазнёміцца з творчасцю сучасных беларускіх паэтаў і пісьменнікаў, такіх як Сяргей Законнiкаў, Раіса Баравiкова, Уладзімір Някляеў, Леанід Галубовіч і шмат іншых.

Падчас другой часткі мерапрыемства яго ўдзельнікі самі падзяліліся з прысутнымі сваімі талентамі: прачыталі на памяць загадзя падрыхтаваныя вершы беларускіх і рускіх паэтаў, заспявалі песні і выканалі музычныя творы сучасных кампазітараў і спевакоў. Завяршылася вечарына музыкі і паэзіі салодкім пачастункам.

Паводле catholic.by

Фотаздымкі можна паглядзець тут.

20 студзеня ў Шчучыне ў кляштары айцоў піяраў адбылася аплаткавая сустрэча настаўнікаў і выхавацеляў.

Традыцыйна яна распачалася з супольнай малітвы і дзялення аплаткай.

За кавай і гарбатай удзельнікі сустрэчы ўспомнілі найважнейшыя моманты мінулага года, звязаныя з душпастырствам настаўнікаў і выхавацеляў, а было іх нямала. Адбылося таксама планаванне будучых мерапрыемстваў.

Завяршылі аплаткавую сустрэчу калядныя спевы.

Сямейнае вымярэнне мела святкаванне Божага Нараджэння ў Шчучыне, дзе адбылася аплаткавая сустрэча для міністрантоў, моладзевага хору і іх бацькоў.

З гэтай нагоды ў мясцовым кляштары айцоў піяраў на дзяленне аплаткай сабралося больш за 100 чалавек. Пачалася парафіяльная «вігілія» з супольнай малітвы Вяночка да Божай Міласэрнасці ў святыні. Малітва была ў інтэнцыі супакою ў сем’ях.

Потым у катэхетычным класе пасля чытання ўрыўку з Евангелля паводле св. Лукі аб нараджэнні Збаўцы была магчымасць падзяліцца аплаткай, складаючы пры гэтым святочныя пажаданні. Акрамя таго, усіх прысутных — а гэта каля 120 чалавек — чакаў салодкі пачастунак. Як для бацькоў, так і для іх дзяцей былі падрыхтаваныя розныя конкурсы, за якія можна было атрымаць падарункі ад св. Мікалая.

Скончылася мерапрыемства супольным спевам традыцыйных калядак і Божым благаслаўленнем, якое ўдзяліў пробашч парафіі а. Вітальд Пяцельчыц SP.

Фотаздымкі можна паглядзець тут.